Nafarroako bertsolari txapelketaren final handia larunbatean izanen da
Txapelaren bila lehiatuko den zortzikotea honako hau: Julen Zelaieta, Arkaitz Goikoetxea, Xabier Legarreta "Arano", Oskar Estanga, Eneko Lazkoz, Xabier Terreros, Estitxu Arozena eta Julio Soto.

Lesakako pilotalekuan izanen da 17:00etan hasita.

Iazko Txapelketan finalerako sarrerak amaitu egin ziren eta jende asko gelditu zen finala zuzenean ikusi ezinik. Aurtengo finalean aforoa zertxobait handiagoa da; hala ere, komeni da horiek lehenbailehen hartzea. Eskuratzeko moduak:

- Internetez, www.bertsosarrerak.eu web gunean
- Nafarroako honako saltokitan: Iruñea (Karrikadenda), Elizondo (Fantxike), Leitza (Maimur liburudenda), Lesaka (Okindegia) eta Etxarri-Aranatz (Xapatero taberna).

Bertso Udalekuak 2010
Haurrek eta gaztetxoek udaran lagun artean goza dezaten Bertso Udalekuak antolatu ditu aurten ere Bertsozale Elkarteak. Bertso afariak, kantaldiak, txangoak, jolasak, kirolak... denetariko ekintzak izaten dira udalekuotan.

Bost txanda izango dira guztira. Uztailean Bidarrain (Nafarroa Beherea), Orion (Gipuzkoa), Irañetan (Nafarroa) eta Muxikan (Bizkaian) eta irailean Zuhatzan (Araban).

Izen-emate epea zabalik dago eta maiatzaren 5a bitartean luzatuko da.

Bi eratara egin daiteke matrikula: atari honetan duzuen formularioa betez edo telefonoz 943 69 41 29 zenbakira deituz.

"Izarra" eta "Kakiturri Ehari" taldeak garaile
Ostiralean, martxoaren 12an, jokatu zen Arabako Kuadrillarteko Bertso Txapelketaren baitan Zuia-Gorbeialdeko ligaren hirugarren saioa, Izarra "vertsus" Elorrio. Bapateko saioan Izarrako taldea nagusitu arren Aramaio izan da ligaren irabazlea eta hurrengo fasera igaroko den taldea, lehen bi kanporaketak irabazita.

Gasteizko ligaren bigarren kanporaketa izan zen, larunbatean, martxoaren 13an. "Kakiturri-Ehari" eta "Muñoko katuak" aurrez aurre eta oso gutxirengatik "Kakiturri-Ehari" izan zen garaile. Oraindik hirugarren kanporaketa falta baldin bada ere, "Kakiturri-Ehari" taldea izango da finalaurrekoetan arituko den Gasteizko ligako ordezkaria.

Gasteizko ligaren azken kanporaketa martxoaren 26an jokatuko da "Muñoko katuak" eta "Aizkorak zorroztu" taldeen artean. 20:30ean izango da bertso afaria Gasteizko Gaztetxean.
ALE (Aiaraldea-Lautada-Errioxa) ligarko azken kanporaketa martxoaren 27an izango da Oiongo Azkena Txokoan 14:00etan egingo den bertso bazkarian. "Errioxa" vs "Aiaraldeko Altubepetekoak".

BBK sariketa: finalaurrekoak erabakita
Aste honetan jokatu dira sailkapen faseko azkeneko saioak eta finalaurrekoak erabakita geratu dira.

Datorren asteartean, martxoaren 16an, izango da lehenengoa "Ipar Uribe" eta "Busturialdea" talden artean. Derioko Txorierri BHI institutuan izango da 11:30eatik aurrera.

Martxoaren 17an jokatuko da bigarren finalaurrekoa. "Bilboaldea" eta "Lea-Artibai" taldeak neurtuko dira Zallako kultur etxean 10:30ean.

Finala Bilboko Kafe Antzokian izango da, martxoaren 26an, 19:00etan.

Bertso afaritara, Irlandara, Hitzetik Hortzeraren kontura!
Lehiaketa berria jarri dute martxan, sari potolo eta guzti: Belfastera bidaia bertan egingo den III. Bertso Dinnerera joateko.

Hirugarren urtez jarraian antolatu dute aurten Belfasten Bertso Dinnera datorren maiatzaren 1erako. Maialen Lujanbio eta Jon Maia joango dira bertara. Haiekin mahaira bilduko dira Irlandako bazter guztietatik, Eskoziatik eta Euskal Herritik joandako ehun bertsozale baino gehiago. Hitzetik Hortzerako kamerak ere bertan izango dira eta bi bertsozale eraman gura dituzte Belfastera. Horretarako puntuak jarriko dituzte programan eta parte hartu nahi duenak puntu horiei erantzunez bertsoak osatu, grabatu eta programakoei bidali beharko dizkie (hitzetikhortzera@digitalak.com) edo facebook-en HHk duen txokoan eskegi.

Astero jasotako bertsoetatik aukeraketa egin eta berezienak jarriko dituzte Hitzetik Hortzeran. Programan erakutsitako horien denen artean bi lagunentzako bidaia egingo dute zotz. Erantzun beharreko puntuak eta gainerako argibideak osteguneko programan argituko dituzte.

Hernandorena 2010: bertsulari gazteen saria
Euskal Herri osoko lurralde ezberdinetako bertsulari gazteak gurutzatu eta kantatzeko plazak eskaini asmoz, aurten ere, Bertsularien Lagunak Elkarteak Hernandorena sariketa antolatu du.

Hiru eskualdetan Zuberoan, Nafarroa Beherean eta Lapurdin izango dira saioak. Muskildin finala jokatuko delarik, Larresoron eta Donibane Garazin kanporaketetan neurtuko dira.

Kanporaketak:
- Martxoak 13, larunbata, Larresoroko kirol sala berrian, 19:30ean.
Bertsulariak: Aimar Karrika, Maddi Ane Txoperena, Ximun Cazaubon, Bixente Hirigarai, Ane Labaka, Eneritz Arzallus. Gai-emailea: Maindi Murua.

-Martxoak 27, larunbata, Donibane Garaziko Kalaka ostatuan, 19:30ean.
Bertsulariak: Itxaso Paia, Txomin Elosegi, Maiana Irigoien, Imanol Uria, Izar Mendiguren, Ander Solozabal. Gai-emailea: Maindi Murua.

Finala: Apirilak 10, larunbata, Muskildiko Posonpesenean, 19:30ean.
Bertsulariak: 6 orotarat. Kanporaketetako irabazleak eta besteak puntuaketaren arabera. Gai-emaile: Joanes Etxebarria.

DF bertsozale eskola 2010
Bertsoaz gehiago jakin eta gozatu gura duen edonori bertsogintzari buruzko dibulgazio saio didaktikoak eskaini asmoz antolatu da Durangoko Platerueneko DF bertsozale eskolaren bigarren zikloa.

Aurten, berbaldi formatuan, 2009ko Txapelketa Nagusiari errepasoa egingo diote.
Lau saio egingo dira: Andoni Egañak oholtza gainean bizi izan dituen txapelketetan zeharreko bertsogintzaren bilakaera aztertuko du; Unai Elizasuk eta Maite Berriozabalek Txapelketa Nagusiko gai-jartzaile taldeko kideek azken txapelketako gaiak aztertuko dituzte; Agin Rezolak eta Iñaki Aurrekoetxeak, Garako eta Berriako kritikariak hurrenez hurren, 2009ko Txapelketak bertsogintzari egindako ekarpenez jardungo dute; amaitzeko, Eider Rodriguez idazleak eta Asier Altuna zinegileak ere euren ikuspegia azalduko digute, bertsozaleak diren aldetik, bertsogintzaz eta txapelketaz.

Martxoak 4: Andoni Egaña.
Martxoak 11: Unai Elizasu eta Maite Berriozabal. Berbaldia sarean jarraitzeko: http://www.plateruena.net/bloga
Martxoak 17: Agin Rezola eta Iñaki Aurrekoetxea.
Martxoak 24: Eider Rodriguez eta Asier Altuna.
Durangoko Plateruenan izango dira 20:00etan.
Izen ematea (15 euro) eta argibideak: kultura@plateruena.net