Lapurdi, Baxenabarre eta Xiberoko bertsu-eskoletako topaketa

2014/04/15

Lapurdi, Baxenabarre eta Xiberoko bertsu-eskoletako 30 gazte bildu dira 3 egunetan (apirilaren14, 15 eta 16) Irabarneko "Chateau de Libarrenx"-en gazteen topaketetan. Bertsu-eskoletako erakasleak begirale lanetan, lagun dituzte eta ekimen ezberdinetan parte hartuko dute. Ekimen hauek modu desberdinetakoak izanen dira, tailerrak, mendi ibilialdia eta beste... Asteartean Andoni Egaña eta Nerea Elustondoren bisita izanen dute, eta elgarrekin afaldu ondoren han bildutakoei, bertsu saioa eskeiniko diete. Asteazkenean berriz, Amets Arzallus izanen dute haiekin bazkaltzen eta ondoren gonbidatuak hitzaldi bat emanen du.

Aurkeztu da Bertsoa Unibertsitatean ekimena

2014/04/15

EHUko uda ikastaroen baitan “Bertsoa Unibertsitatean” eskola antolatu dugu EHUko Uda Ikastaroak eta Mintzola Fundazioak elkarlanean eta Gipuzkoako Foru Aldundiak babestu du proiektua. Bost urteko hitzarmena adostu dugu, beraz, aurten hasi eta datozen 4 urteotan bertsolaritzari eta ahozkotasunari buruzko 5 egunetako eskola prestatuko dugu. Zikloa hitzaldi, mahai-inguru eta performancez osatuko da, eta uztailaren bigarren astean emango da, Miramar Jauregian.

Bertso giro aparta Bardoen Lesakako finalean

2014/04/12

Giro ederrean amaitu da Lesakan Bardoak Nafarroako taldekako ekimenaren bigarren edizioa. 360 lagunek bete dute herriko frontoia eta taula gainean hiru taldeek eskaini duten bertso saioarekin disfrutatu dute. Baztango Lepatanatuek 2 taldea izan da aurtengo Bardoetako irabazlea.

Virginia Imazekin formazio tailerra egingo da uztailean

2014/04/11

Bertsozale Elkarteko Genero Taldeak sorkuntzari begirako formazio tailerra antolatu du, 4. urtez, Oihulari Klown taldeko Virginia Imazekin. "Inprobisazioa eta umorea eskenategian" deritzo tailerrak, eta asteburu pasako formatua du. Uztailaren 4tik 6ra egingo da Bergarako Aibar baserrian (Oihulari Klownen aterpetxean). Izen ematea apirilaren 28an zabalduko da.

Gipuzkoako Eskolarteko finala eta Bertso Eskolen Eguna maiatzaren 25ean Arrasaten

2014/04/11

Bertso Eskolen Egunean parte hartu nahi dutenek txartelak www.bertsosarrerak.eu atarian eskuratu behar dituzte. Eskolarteko finala goizean izango da eta arratsaldean bertaratzen diren guztientzat jolasak antolatu dira.

Azkoitian jokatu zen Eskolarteko azken kanporaketa

2014/04/11

Atzo ospatu ziren saio didaktikoa, idatzizko eta bat-bateko sariketak • Azkoitiko Iraurgi elkartean jokatu zen bat-bateko saioan Aratz Igartzabal izan zen garaile • Zuzenean sailkatu da finalera

"Bertsoa unibertsitatean" eskola aurkeztuko da asteartean

2014/04/10

Uda Ikastaroen baitan Mintzola Fundazioak eta Euskal Herriko Unibertsitateak elkarlanean antolatu dugun bertsolaritzari buruzko “Bertsoa Unibertsitatean” eskolaren aurkezpen prentsaurrekoa datorren asteartean izango da, apirilak 15, goizeko 11:00etan, Amasa-Villabonan, Mintzola Fundazioaren egoitzan.

Larunbatean jokatuko da Lesakan Bardoen finala, hiru talderekin

2014/04/10

Otsailaren 7an martxan jarri zen Bardoak Nafarroako taldekako bertso txapelketak amaierako ekitaldia izanen du larunbatean, Lesakan jokatuko den finalarekin. Azken bi hilabeteotan Nafarroan barna 22 saio jokatu ostean, hiru taldek lortu dute finalerako sailkatzea: Baztango Lepatanatuek 2, Iruñeko Bertze maldikoak eta Leitzako Harrapazank. Finala 17etan hasiko da, Lesakako frontoian.

Albiste gehiago

RSS ikonoa Twitter ikonoa fb email

BDB gaur

1989-04-23 Baigorri

Ernest Alkhat, Jexus Arzallus

Arzallus:
Zu nola zeran maitasunaren
ondorioaren lora
zure amatxok esaten duna
beharko dezu gogora
hortik kanpora irtetzeko ere
badatorkizu denbora
ez dezu beste erremeiorik
laster bazoaz kanpora.

Alkat:
Kanporatzeko etortzen zauzkit
zoritxarrean orduak
ama maitea sortu aurretik
zunzendu otoi konduak
ez dakit bada neretzat zer den
zer erakusten munduak
sabeleraino entzuten ditut
faltsukerizko ohiuak.

Arzallus:
Egia da bai faltsoa dela
munduan gaurko eguna
zu sortu nahian hala ta guztiz
hartu nun senar laguna
sabela ere estua bait da
gainera oso iluna
nere besotan probatu zazu
ama baten maitasuna.

Alkat:
Amak deraukan maitasun hori
bertze nonbait gaur daikea
baina etxean entzun izan dut
bada sua eta kea
sabel barruan gehiago atxik
egin nahi dut eskea
munduak ez daut eskeiniko ez
zure barneko bakea.

Arzallus:
Nere barruan ezin iragan
bere bizitza osoa
hortik atera ta ikus bitza
etxea eta hauzoa
zuri begira dago aitatxo
baita ere nere altzoa
altzo hortantxe ikasi ditzan
kantua eta bertsoa.

Alkat:
Ez dakit zer den kantua eta
zer dagon bertsolaritza
zure sabelak hazi nau eta
zer da kanpoko bizitza?
ama maitea sortu aurretik
entzun nahi nuke hitza
mundua baino nahiago dut
ama on baten geriza.

Bizitza diot mutil

Eskertzekoa da Lasarte bertsolari handi eta kantari gustagarriak egin digun Nafarroako bertso doinu askoren ekarpena, euskaldun guztion altxorra aberastuaz.