Noizbait bukatu behar eta 1992 urtearen amaiera ezkeroko doinurik ez duzu hemen aurkituko; 1993 urteko bertso txapelketa nagusian plazaratutakoak adibidez ez datoz hemen. Baina zorionez gure bertsolaritzak osasun ona du eta aurrera darrai bere fruitu berriak etengabe emanaz eta Doinutegi hau azkar geldituko zaigu zaharkitua doinu berriak geureganatzen jarraitzen ez baldin badugu. Ez adiorik beraz, bertsozale, gero arte baizik. Sortzen diren doinu berriak jasotzen jarraituko dugu eta oraingoan halabeharrez albora gelditu zaizkigun zaharrak biltzen ere bai. Behin behineko amaiera da beraz hau eta Euskalerriak bizirik dirauen artean badakigu kantari jarraituko duela eta bilduma honek ere emango al ditu kimu berriak.

Joanito Dorronsoro
Zumaian, 1994 urteko Santa Ageda egunean