Sarrera Orokorrean esan bezala komeni da bereiztea herri kantu eta bertso doinu popularren jasotzaile edo biltzaileak alde batetik eta zabaltzaile edo dibulgatzaileak bestetik. Haiek herriak ahoz aho zerabiltzan doinuak kantutegietara jaso edo bildu zituzten, zehaztasun zientifikoz jaso ere, eta dibulgatzaileek haien kantutegietatik hartu eta herrian zabaldu dituzte, nahiz liburutxoen bidez nahiz disko-kaseten bidez eta informaziorik gabe, orokorrean behintzat. Musikadun liburutaz ari gara hemen batipat; 200 inguru erabili ditugu, horietako batzuk melodia hutsez datoz eta beste batzuk harmonizaturik. Baina sartu ditugu musikarik gabeko zazpi bertso edo kantu liburu dibulgatzaile oinarrizkoenak ere. Eta baita 230 inguru disko-kaset ere, bertsoz grabaturik, doinua gure lurrean zenbateraino sustraitu ote den jakitea komeni baitzaigu.

Bibliografia honetako autore eta liburu diskoen zerrenda luze honetan maila eta garrantzi desberdinetakoak dituzu. Izar klase guztietakoak datoz bat bestearen ondoren, batek mila doinu dakarzkigun bitartean, bestea bizpahirurekin bakarrik baidatorkigu. Zerrenda berean datoz pianorako partitura solteak, eta baita Pastoral liburutxoa ere adibidez, atzekaldean bi orritan doinuak dakartzalako.

Badakit asko eta onak uzten ditudala albora baina bertsozaleari lana erreztearren eta izar argitsuenak aipatuz, J. D. Salaberri mauletarra, J. A. Santesteban donostiarra, Charles Bordes frantsesa, R. M. Azkue lekeitiarra, Aita Donostia, Dufau-Barbier-Gabriel Lertxundi Ifarraldekoak eta Antonio Zabala tolosarraren lan eskerga nabarmenduko nituzke jasotzaileen artean, besteak beste. Puntu honetara iristean berriro aipatu behar dut Aita Donostiaren Obras Completas delakoak oraindik argitara gabe egotearen hutsune mingarria; baina bestalde, Aita Jorge de Riezu kaputxinoa izan dugu Donostiaren aingeru goardako leiala, honen lan gehienak zientifikoki argitaratzen lan paregabea egin diguna.

Zabaltze lanetan aipagarriak dira besteak beste Ifarraldean Mariya eta Kantuz liburutxoak eta Hegoaldean hainbeste argitalpen izan duen Boga Boga popularra. Disko-kasetei buruz berriz ikusiko duzu zerrendako asko argitaletxeen bitartez argitaratuak izan baldin badira ere, beste asko grabazio partikularrak direla, neuk edo adiskideek grabatuak.

Bertsozaleak argiago ikus dezan, atal desberdinetan banatu dugu bibliografia: musikadun liburu eta partiturak alde batetik, musikarik gabeko zenbait liburu oinarrizko bestetik. Erabili ditugun disko kasetak ere bi ataletan bereizi ditugu; argitaratuak eta argitara gabeak.