Edozein moduz ere, ni ere eskerrak eman beharrean nago, doinuak niganatzeko laguntza eskatu diodan orok nahiz bertsolari nahiz bertsozale, eskuzabal luzatu baitit. Hamabost urte luzeotan lagundu didaten guztien izenak ezin bada zerrendatu hemen, baina gogoan ditut besteak beste Loiola irratiko Joxe M. Iriondo eta Laxaro Azkune, Egin irratiko Pili Kalzada, Zarautzen bizi den Iñaki Garmendia zaldibitar bertsozalea, Joxe Antonio Ormazabal adiskidea, Nikolas Segurola, Pello Zabala eta Bitoriano Gandiaga frantziskotarrak, Mitxel Lekuona, Baxakarte bertsolaria eta beste asko. Kitatu ezineko zorra dut Hondarribiako Fermin Olaskoaga adiskide leialarekin, berak gidatu bainau pazientzia eramankorrez ordenadore sorginaren manejuetan. Eta azkenik esker onez aitortu Euskalerriko Bertsolari Elkartea, Doinutegi hau burutzeko eskeinitako laguntza eta argitaratzeko bere gain hartu duen ardura osoa dela eta, ez jakin bestela noiz arte egon beharko ote zuen gure etxeko armario zokoetan.

Herriaren ondasunak dabilzkigu eskuartean; gure hizkuntza, kantu, bertso, dantza, otoitz. . . Euskalerriak orrialdeotan datozen bitxi hauen bidez kanporatu ditu gizalditan zehar bere barrengo sentimendu klase guztiak. Gure lurrean historian zehar sortutako lore desberdinen baratza bizia dela badakit bilduma hau, aurrera ere guk bertsozaleok zainduko baititugu gaurko eta biharko bertsoz jantzirik. Hemen datorren doinu bakoitzak du bere historiatxo luze edo laburra. Batzuk bizitza oparo eta izen haundiaren jabe egin diren bitartean, beste batzuk noizbait norbaitek sortu bai baina geroztik ez dute inongo osperik lortu gaur arte, baina agian bihar zuk eman deiokezunaren zain dauzkazu. Garai bateko oroigarri soila edo lore zimelduen sorta izango litzateke bestela.

Ageriko eta ezkutuko hamaika gizon emakumek sortu, kantatu, gorde, jaso eta mimatuak izan dira. Inorenak ez eta guztionak dira gaur; denon zerbitzurako dauzkagu hemen. Bertsolari, musikari, bertsozale, aztertzaile, eta mila lanbidetako euskaldun giza-emakume anonimoren itzala dabil hor tartean, eta aurrera ere berdin jarrai dezala.