1936ko urtarrilaren 12an jaio zen, Azpeitian (Gipuzkoa), nekazari familia batean. Bertsozaletasuna aski errotua zegoen inguru hartan, eta Lazkanok ere txiki-txikitatik agertu zuen zaletasuna. Lagunartean eta erromeria giroan hasi zen bertsotan, eta 60ko hamarkadatik hasi eta gaur egun arte plazarik plaza ibili izan da. 80ko hamarkadako bertsolaririk garrantzitsuenetakoa izan zen, eta bi garai eta tradizioren arteko zubi lana egiten ahalegindu zen, eredu klasikoen eta berrizaleagoen artekoa. 1982ko eta 1989ko Txapelketa Nagusietan azken saiora iritsi zen, eta Gipuzkoako Txapelketan ere bitan heldu zen finalera, 1962an eta 1964an. Bere garaiko bertsolari gehienek ez bezala, bertso jarriak egiteko joera izan du. EHBE Euskal Herriko Bertsozale Elkartearen lehendakaria da erakunde hori sortu zenetik bertatik. Bertsolarien arteko zubi lanean bezala, Imanol Lazkanok garrantzi handia eduki du bertsolaritzaren mugimendua bateratzeko eta garai desberdinetako ikuspegiak biltzeko orduan.

Gaur egun Azpeitian bizi da, erretiratua dago eta 2003an, bere memoriak biltzen dituen liburua argitaratu zuen.