Txapelketak Araba 2005 Aurkezpena

ARABAKO BERTSOLARI TXAPELKETA 2005
Aurkezpena

KONTURATU al zarete duela 30 urte basamortu zena oihan mardul ari zaigula bihurtzen? Lehen euri tantak Gasteizen erori eta putzu sakona sortu zutenetik, bertako jarioak Araba osoa zipriztindu du, gure lurraldearen itxura zeharo aldatuz: berde ageri zaizkigu Aiara eta Gorbeialdea, heze eta emankor Lautada, eta gero eta bustiago Errioxa ere. Ugaritu egin zaizkigu landare eta zuhaixkak; jaialdi eta bertso-eskolak. Eta nola ez, baita bertsolariak ere. Gure lurraldeko txoko guztietatik etorri dira, aurten ere, Txapelketako 23 bertsolari partehartzaileak, eta eskualdez- eskualde ibili eta gero, Gasteizen, berdegunearen erdigunean, elkartuko ditugu guztiak Apirilaren 9an Jesus Guridi Auditorioan. Ea Arabako Bertsolari Txapelketa hau bertsozale guztion freskagarri suertatzen den.