Txapelketak Araba 2006Aurkezpena

ARABAKO BERTSOLARI TXAPELKETA 2006
Aurkezpena

 

AZKENEKO ia urte bete honetan bizitako bertso zurrunbiloak ederki erakusten du bertsolaritza nola dagoen, zer den: bide luze bat da bertsolaritza, eta bideari ekin nahi dionak, nekez aurkituko du aitzakia edo trabarik horretarako: Bideari ekin diezaioke ume, gazte, zein ez hain gazte denak, emakume edo gizon, euskaldun zahar zein berri, Lapurtar zein Arabar… Baina bidea luzea da, hori bai, oso luzea. Eta bide luze horretan batzuk aurreratuago daude, beste batzuk ez hainbeste. Baina oraindik bidearen amaiera beharrean hasiera gertuago izateak ez digu etsi arazten. Indarra ematen digu gogotsu zango bat beti bestea baina aurrerago jartzeko. Eta nahiz eta tarteka estrapuzu egin, nahiz eta noizean behin atsedenalditxoren bat hartu, nahiz eta eguraldiak beti ez lagundu, aurrera goaz. Beti aurrera.
Bide horretan doazenetako 20 dira 2006ko Arabako Bertsolari Txapelketan parte hartuko dutenak. Batzuk aspaldi ekin zioten bideari, beste batzuk orain gutxi. Batzuk saltokoa doaz, beste batzuk pausatuago baina atsedenik gabe. Baina guztiak ere aurrera. Beti aurrera.