Txapelketak Araba 2007Aurkezpena

ARABAKO BERTSOLARI TXAPELKETA 2007
Aurkezpena

ABTX’07:
JATORRIZKO IZENA

JATORRIA: Ba ote gatoz nonbaitetik? Ba al dugu atzetik norbait inguru hauetan? Araba historiadun lurraldea omen, baita bertsozale eta bertsolarion ikuspuntutik ere: hasi Iruña Beleiatik eta Lazarraga ezagutu arte... ba ote dugu jatorririk?

IZENA: Eta izenik? Egin al dugu izen bat jadanik, gero eta anitzagoa den gure mundu honen altzoan? Eta izen bat egin baldin badugu; zein da, nolakoa da? besteengandik antzekoa edo desberdina al da? Zer suposatzen du izen bat edukitzeak?
Galderek, zalantza eragiteaz gain, badute helburu bat: aurtengo Arabako bertsolari txapelketa aurkeztea. ABTX’07: JATORRIZKO IZENA irakurri duzue izenburu bezala. Txapelketako 20 bertsolariek jatorria badutelako (lautadetako mahatsaren zukutik lur azpian ernetzen ari diren fruituetaraino), eta baita izen bat ere. Eta denborak ontzen dituelako jatorria, eta baita izena ere.

Bertakoa da arabar bertsolaritza, etxekoa, lurretik sortua eta lurrari emana. Hurbileko zaporea (zuen zaporea) gozatzera animatzen zaituztegu. Iritsi da uzta!