Bapatean 1999

XXVIII. Osinalde Saria

Finala

GABIRIA (1999-04-24)

Bertsolariak: E.Eizagirre, Uranga, J.Gojenola, Perea, E.Goikoetxea eta A.Goikoetxea

Gai-jartzailea: Iñaki Murua

Goikoetxea-J.Gojenola

Gaia: Zu, Ekaitz, hainbeste urtean etxe huts batean bakarrik egon zaren sagua zara eta une honetantxe sartu da atean bizilagun berria, Joseba.

Neurria: 8ko nag.
Doinua: Balentin Berriotxoarena

E.Goikoetxea:              Bakardadean ni arrenkuran
                               ibili izan naiz sarri;
                               bizilagun bat atean barna,
                               aguro diot igarri.
                               Otordua ta harreman fina
                               uztarketaren oinarri,
                               izotza urtu behar degu ta
                               gazta pixka bat ekarri. (bis)

J.Gojenola:                 Gazta ta lagun kontuak orain
                               utzi itzazu aparte,
                               mesede gutxi egiten duzu
                               ta sarri askotan kalte.
                               Saguen kontra jarduna naiz ni
                               bizi guztian jo ta ke,
                               aprobetxatu ezazu orain
                               katua erosi arte. (bis)

Goikoetxea:                 Bakardadea gustokoa det,
                               bakardadean naiz jaio,
                               katu kontuan murgildu arren,
                               irrikatsu eta iaio;
                               nere atzetik eginagatik
                               hainbat ahalegin ta saio,
                               zulo txikitan ni harrapatzen
                               majo kosta behar zaio! (bis)

J.Gojenola:                  Katua alperrik izango dela
                               diozu aho betean,
                               baina errekurtso gehiago dauzkat
                               zure kontra atakean;
                               kontuz ibili zaitez sagutxo
                               armarioko atean,
                               agian gazta jarriko dizut
                               bainan tranparen batean. (bis)

Goikoetxea:                 Lehen liparra pasa ondoren
                               beldurtua naiz zeharo,
                               zure alboan jolas ta solas
                               ezin naiz egon luzaro.
                               Neskalaguna ezagutzeko
                               irriki bizian nago,
                               ezkutatzeko izan dezadan
                               beste zulo bat gehiago. (bis)

J.Gojenola:                 Zuk kontrolpean nola dituzun
                               zeu izkutatzeko zonak,
                               beti izan naiz serioa ta
                               ez ditut onartzen bromak.
                               Bete-betean tapatzen ditu
                               zuloak sarri gizonak,
                               irteera bat duten zuloak
                               ez dituzu horren onak. (bis)