Bapatean 2000

Ordizia (2000-01-01)

Bertsolariak: Egaña, Mantxi, Zulaika,
Garmendia, Irazu eta Usandizaga.

Gai-jartzailea: Laxaro Azkune.

Gipuzkoako Herri Arteko Txapelketa 99ko finalaren errebantxa, Euskaldunon Egunkariak antolatua Argi Berri Elkartearen laguntzarekin. Herriko antzokian izan zen, arratsaldeko seietan.

Irazu - Egaña

Gaia: Irazu bertsolaria izango da eta Andoni honen jarraitzaile sutsua. Azpeitiko finala ikustera joan zen, eta ez dakigu zergatik, baina ondoeza egin eta erietxera eraman zuten Andoni. Gaur, Irazu bisitara joan zaio.

Neurria: 8ko nag.
Doinua: Kantore berri xarmant batzuek

Irazu:            Jarraitzailea omen zera zu,
                     hortan badezu indarra;
                     animo eman, animo eman,
                     hoi dezu eslogan bakarra.
                     Azpeiti aldeko esperientziak
                     sortu dizu ezbeharra,
                     poto xixtrin bat egin nun baino
                     zer egin nun hain gauz txarra? (bis)

Egaña:            Nik zure alde ipini nitun
                     gogoa eta kartera,
                     baina egun onik ez zendun izan
                     gu biontzako kaltera.
                     Bihotzekoa sufritu nuen,
                     kontuak hortik atera,
                     azeleratu egin zitzaidan
                     zure mingainaz batera. (bis)

Irazu:             Honta ezkero sekretu dana
                     esan beharrean nago:
                     milioi erdi bat apustu egin,
                     ibili zinan oparo;
                     bezperatikan zure usteak
                     kolpetik bertan akabo,
                     nei zarauztarrek eman zidaten
                     hoi baino askoz gehiago. (bis)

Egaña:           Ai Jexux Mari, nere idolo,
                     holakorikan ez kanta,
                     beti izan zera mutil gazte bat
                     zintzoa eta xarmanta;
                     orain alperrik egingo dezu
                     mutil tongistaren planta,
                     zui zarauztarrek eman zizuten
                     muturreko bat galanta! (bis)

Irazu:             Muturrekuak hartu litezke
                     ibilian-ibilian,
                     Azpeiti aldian saiatu nintzan
                     oso modu formalian.
                     Muturrekuan ondorengua
                     oso modu apalian,
                     neri Añotan pasa zitzaidan
                     ta zuri ospitalian. (bis)

Egaña:
                     Bihotzekotik aspalditxoan
                     ibili naiz ihesian,
                     osasuna're mejoratu zait
                     medikuen babesian.
                     Nik jarraitzaile segi nahi nuke
                     aukera dedan guzian,
                     zure ondoan izango nauzu
                     Txapelketa Nagusian. (bis)