Bapatean 2000

Gaia: Jakin dudanez, Eliz Ama Santak historian zehar egindako okerrengatik barkamena eskatu behar omen dio munduari. Lagundu'iozue zuek zertan barkamena eskatu beharko lukeen, zuen ustez, Elizak historian zehar egin dituen okerrak gogora ekarriz.

Neurria: 8ko nag.
Doinua: Haize hegoak hurbiltzen ditu

Egaña:             Hainbat pertsonak esan izan dit
                      "hi haiz erretzaile fina",
                      ta erretzea txarra degula,
                      hori da gauza jakina.
                      Erre zituen horko ateo
                      eta besteko sorgina...
                      gure historian Eliza izan da
                      erretzailerik haundina. (bis)

S. Lizaso:         Mundualdi hau hasia omen
                      paradisu jardinetik,
                      hamaika aldiz entzun da hori
                      apaizaren mitinetik!
                      Zaharrak hasi eta ondoren
                      segi bide berdinetik,
                      bainan fedeak ez du lekurik
                      arrazoiaren gainetik. (bis)

Egaña:             Vatikanoko jauntxo haundiak
                      mahai ertzean daude bapo,
                      hango kapila sistiman bada
                      joia eta bitxi pranko;
                      Elizak ere barkazioa
                      eskatu egin beharko,
                      pobretasuna goratu eta
                      aberastu egin zalako. (bis)

S. Lizaso:         Garai batean Ama Eleiza
                      oso goian zen kokatu;
                      herri xehearen babesle gisa
                      geroztik ez du jokatu.
                      Ondo pentsatzen jarri ezkero
                      ez ote degu pekatu?:
                      ikuste'ztana agindu eta
                      ikusten dena ukatu. (bis)

Egaña:             Elizak ere pekatu batzuk
                      eginak ditu praktikan,
                      hargatik orain hasi behar du
                      barkamenaren platikan.
                      Aita Santuak berak zioen:
                      "kondoi guztiak utikan";
                      auskalo zenbat hil diran SIDAz
                      hitz txatxu hoiengatikan! (bis)

S. Lizaso:         Garai batean hainbat herritar
                      Eleizaren barrenean,
                      gauzak aldatzen joan dirade
                      denboraren joanean;
                      Eleiza ere barkamen eske
                      hasi zaigu azkenean,
                      gaiztoena ere damutzen omen
                      hilzorian dagonean. (bis)