Bapatean 2000

Nikolas Izeta zenaren omenez Bota Punttuba bertso eskolak antolatutako jaialdia. Udarregi ikastolan, gaueko hamar eta erdietan. Omendua izan zen ardatz jaialdi osoan. Haren bertso jarri zenbait kantatu zituzten eta gaiak ere haren pasadizoen gainekoak izan ziren. Saioaren hondarrean nahi zuten guztiek agurreko bertsoa kantatu zuten, besteak beste, Lazkanok, Egañak, Muruak eta Telleriak.

Amuriza

Gaia: Iturengo Aurtitzen bertso bazkari baten ostean hiru ordu jardun zenuten zuk eta Nikolas Izetak bertsotan, tabernari baten lagunaren urtebetetzea zela-eta han geunden gehienok bertso bana eskaini ondoren.

Neurria: 10eko nag.
Doinua: Aita izena kanta beharrak

                      Nikolas hola ezautu nula
                      zortzi urte badirade,
                      Nafarroako Aurtitz auzoan
                      bazkalondoan han gaude;
                      ezezagun bat hasi zitzaidan
                      kantuan dale ta dale!
                      Hiru ordu pasa egin genitun
                      doinurik aldatu gabe
                      eta geroztik gelditu nintzan
                      lagun kutun baten jabe. (bis)

                      Hi ere hantxe hintzen Nikolas
                      beste lagunen taldean;
                      Izeta hintzela erantzun hidan
                      nor ote hintzen galdean;
                      hiru ordu hantxe lapak bezela
                      zeinek zein hartu mendean;
                      azkenerako neuk moztu nian
                      saioa iluntze aldean,
                      hik bukatzeko zain egon banintz
                      oraindik hantxe geundean! (bis)

                      Hire lehenengo gomuta haiek
                      nola nitzake diseka,
                      lagun artean hantxe alkarri
                      ziri, burla ta iseka;
                      hi ez zekiat baina ni behintzat
                      gelditu ninun aseta;
                      nere bizitzan sartu dan puska
                      kutun bat izan haiz eta,
                      aldi berean gogoratuko
                      ta maiteko haut Izeta. (bis)