Bapatean 2000

Gai-jartzaileak: Joseba Santxo, Mikel Taberna, Jose Mari Agirre "Txato", Laxaro Azkune, Karlos Aizpurua, Joxerra Garzia, Pantzo Hirigarai, Saroi Jauregi, Aloña Galarraga, Rufino Iraola, Antton Kazabon, Igor Aldanondo, Bernardo Mandaluniz eta Josu Goikoetxea.

Hitzetik Hortzeraren ikasturteko azken programa zela-eta antolatutako bertso bazkaria. Pagoa garagardotegian, arratsaldeko ordu bi eta erdietan. Hirurogeiren bat lagunek bazkaldu zuten bertan, baina bazkalondoan jende gehiago ere inguratu zen saioa entzutera. Maila oneko saioa izan zen, oro har. Bero ikaragarria egin zuen egun horietan Euskal Herrian.

Amuriza - Egaña

Gai-jartzaile: Joseba Santxo

Gaia: Bakarrizketa bik elkarrizketa bat osa al dezakete? Andoni, hi, naufrago bat haiz itsasoaren erdian ohol baten gainean. Badator itsasontzia Amurizak gidaturik. Ikusi hau, eta aurrera egin beharrean gelditu egin da. Biok zaudete elkarri begira, baina elkarrengandik urrun, eta gogoetan hasi zarete, baina ez diozue elkarri entzuten. Naufragoa hasi, neurri eta doinu egokian. (5)

Neurria: Berezia
Doinua: Itsaso hori dago zatarra

Egaña:             Untzi hau nere brujula iparra,
                      orain loratu zait irriparra;
                      hara untzi bat nun abitu den
                      niregana tirri-tarra! (bis)
                      Nere destino baldarra
                      ez da bihurtu edarra;
                      etsipenezko didarra...
                      hauxe da nere desgrazia ta
                      hau da nere zoritxarra,
                      tipoa hemen geratu eta
                      txapela eman beharra! (bis)

Amuriza:          Hau da trantzea, hau aldartea,
                      entzunezina da bitartea!
                      Eta bakoitzak izan behar du
                      destino hontan partea. (bis)
                      Badaukat borondatea
                      irekitzeko atea,
                      honantz hurbildu zaitea...
                      Baina agian pentsatuko zun
                      suizidatzera joatea,
                      eta salbatzen badut egingo
                      diot betiko kaltea. (bis)

Egaña:
                      Nere ezina, nere kaltea
                      zein dan, mesedez, ohar zaitea,
                      kostatu baizait zazpi urtean
                      buruan eramatea; (bis)
                      ustegabeko dotea
                      txapelakiko trotea,
                      bizitzaren truk botea...
                      ez da normala pare-parean
                      ene kapitan maitea;
                      hain xuxen horri deitzen diot nik
                      kriminala izatea. (bis)

Amuriza:          Kapitain honek badauka zama
                      eta bihotzak haruntz darama,
                      nahiz ta lehenago izana dudan
                      korsario baten fama. (bis)
                      Horrek izango du ama,
                      bihotzean daramana;
                      hau da destino bakana!
                      Begiratuta izan behar du
                      ene Egaña laztana,
                      Zarautzen hasi surfean eta
                      itsasoan galdu zana. (bis)

Egaña:             Surfean beti nabil erronkan,
                      gaurkoan kilak danba arrokan;
                      taula xaxtar bat lagun dedala
                      hemen nabil gaurko hontan (bis)
                      salbamenaren zelotan,
                      halare errezelotan
                      jaus nadin zure besotan;
                      pelma tankera hartzen dizut nik
                      hizketan eta bersotan;
                      untzira igo ninteke baina
                      isilik egotekotan. (bis)

Amuriza:          Nola aurkitu naizen honela,
                      bizi bat neure eskuan dela,
                      baina uste dut uhin berri bat
                      erdira badatorrela. (bis)
                      Hau ez da hilaren eskela,
                      nolatan esan bestela?
                      Ez daukat bihotz ustela;
                      salba nahi badu utziko diot
                      bere eskuan batela,
                      baina mesedez utzi dezala
                      lehengo lekuan txapela. (bis)

Egaña:             Hau bizi-nahia ta hau antsia,
                      arnasa zer den ere ahantzia!
                      Salbazioak une hauetan
                      badu bere garrantzia. (bis)
                      Hartua daukat etsia,
                      txapela bertan utzia,
                      horra azken irrintzia;
                      zoaz bakarrik mesede baitut,
                      hau da nere iritzia;
                      zure atzetik belaxe dator
                      Lopategiren untzia. (bis)

Amuriza:          Bizkaiak badu nahikoa tratu,
                      beltz batek ez nau gaizki tratatu;
                      utzi pakean hari eta guk
                      behar dugu egin paktu. (bis)
                      Uretan elkar topatu,
                      nik salbamena opatu
                      ta honek irudiz ukatu;
                      txapela ere lehia onean
                      hementxe dugu jokatu;
                      orain berdin zait biok hondatu
                      edota biok salbatu. (bis)