Bapatean 2000

Urruña (2000-02-06)

Bertsolariak: Kolina, A. Arzallus, S. Lizaso,
Lujanbio, Irazu eta Xalbador II.a.

Gai-jartzailea: Karlos Aizpurua.

Hazia Elkarteak eta Iparraldeko bertso eskolek azken hauen alde eratutako jaialdia. Itsas-mendi zineman, arratsaldeko lauretan; ehun eta berrogeiren bat entzule.

A. Arzallus - S. Lizaso

Gaia: Hi, Amets, Iparraldeko bertsulari gaztea haiz eta lo hagoela, ametsetan, Xalbador azaldu zaik.

Neurria: 10eko txi.
Doinua: Hamalau heriotzena

S. Lizaso:        Zu ametsetan zaude,
                     gainera trantzean
                     ta ni zure zai nago
                     amets bakoitzean.
                     Mundutik alde nuen
                     epea amaitzean,
                     bainan gogoan izan,
                     ez utzi atzean:
                     luzaro bizi nahi dut
                     zure bihotzean.

A. Arzallus:      Nahiz eta egon hainbat
                     urteren aiduru,
                     zuen bidetik gogor
                     hemen gabiltza gu.
                     Izana segitzea
                     da gure helburu;
                     eta biziko zara,
                     zu egon seguru,
                     guk zuen ahotatik
                     kantatuko dugu.

S. Lizaso:        Hasi berritan nuen
                     bakarrik jokatu
                     eta berehalaxe
                     nik Mattin topatu;
                     Xanpun eta Ezponda
                     gero inguratu...
                     Nahiz beste mundurako
                     bidea nik lotu,
                     bertsolaritza ez zen
                     gurekin bukatu.

A. Arzallus:     Kantari ari gera
                     lehen zuen antzera,
                     nahiz ta gaurko denbora
                     ez doan atzera,
                     segi nahiko genuke
                     zuen kantakera,
                     baina ez gabiltz berdin,
                     egiz ari zera:
                     bertsoa jeitsi dugu
                     menditik kalera.

S. Lizaso:        Menditikan kalera
                     behar zen neurrira
                     eta gero entzuleen
                     bihotzan erdira;
                     segi zazu horrela,
                     bidea hori da;
                     ametsa helduko da
                     noizbaiten egira,
                     amets egin dezaket
                     Ametsi begira.

A. Arzallus:     Hemen bertsolaritza
                     egon denez grabe,
                     lanean hasi gara
                     umil ta herabe
                     egin nahiean lehengo
                     garai zaharren jabe;
                     kantatu nahi dugunez
                     Xalbadorren pare,
                     amets egiten dugu
                     lorik hartu gabe.