Bapatean 2001

Ermua(2001-03-24)

Bertsolariak: J. Agirre, Sorozabal, A. Agirre, Ugartetxea, Gaztelurrutia eta Estiballes.

Gai-emailea: Asier Ibaibarriaga.

Korrika Kulturalaren barruan Debabarreneko Bertso Eskolak antolaturiko jaialdia. Zineman, gaueko hamar eta erdietan.

A. Agirre-Estiballes

Gaia: Jakingo dozue duela zenbait aste bikote bat ur azpian ezkondu zala, eta hemen dogu bikotea. Ze moduz doakizue?

Neurria: Berezia
Doinua: Uso xuria errazu I

Estiballes:         Ezkondu nahi gendun egin,
                      pentsatzen genduen berdin. (bis)
                      Aquariumean benetan ondo
                      han dauden tiburoiekin,
                      ta oin ohartu naiz ni ere ezkondu
                      naizela beste batekin. (bis)

A. Agirre:          Beraz tiburoien pare,
                      motea jarri debalde.(bis)
                      Hala uste nuen baina ez naiz egin
                      zoriontasunan jabe,
                      gizon honekin itota nabil
                      uretatik kanpora're! (bis)

Estiballes:         Atakea lehen hitza,
                      eta gainera bortitza. (bis)
                      Purgatorioa bezain txarra da
                      honekin dudan bizitza,
                      nahiago nuen ezkondu aurretik
                      optikara juan banintza! (bis)

A. Agirre:         Zertan zabiltz ahobero,
                      sortuz hamaika endredo? (bis)
                      Tiburoiaren antza ez dedanik
                      nola ez nuen espero,
                      ni ere txukun ibil naiteke
                      domestikatu ezkero. (bis)

Estiballes:         Ezkondu ginen bezala
                      berriz joango gara hala, (bis)
                      ta tiburoien piszinatxora
                      botako dut berehala.
                      Han epailerik ez da beharko,
                      dibortzio naturala. (bis)

A. Agirre:         Gizonak a ze azala!
                      kantatu duen bezala: (bis)
                      "Bertara bota ta izango da
                      dibortzio naturala";
                      zuk ezin nauzu sekula jan ta
                      tiburoiak jan nazala! (bis)

Estiballes:         Ezin dut jan, ezin uka,
                      eta hau gure burruka! (bis)
                      Halan da ere esanarekin
                      zu zabiltza erratuta.
                      Zer jan nahikoa baduzu baina
                      nahiko gaizki prestatuta. (bis)

A. Agirre:         Beraz egin zazu barau,
                      nola egun ta nola gau. (bis)
                      Ohe kontuan jolas garaian
                      ezin bete hainbat arau.
                      Nere goxoa ez du estimatzen...
                      gatzik gabeko ume hau! (bis)

Estiballes:         Beti dabil hitza hartzen,
                      sekula ez da aldatzen. (bis)
                      Ermuan ere ikusi dute
                      zeinen gaizki bizi garen;
                      diskusioan hasi ezkero
                      sekula ez dugu bukatzen. (bis)