Bapatean 2001

Bergara (2001-04-07)

Bertsolariak: S. Lizaso, Irazu, Egaña, Peñagarikano, Gorrotxategi eta Mendiluze.

Gai-emailea: Laxaro Azkune.

Erramu zapatuan urtero egiten den jaialdia. Pilotalekuan izan zen, ehun eta berrogeita hamarren bat entzule bertan zirela. Giro polita eta saio arina.

S. Lizaso-Egaña-Gorrotxategi

Gaia: Penak kontatzen hastea ez da ona izaten saioan, baina niri gaur, hemen, zuei hiruroi proposatzeko izen bat etorri zait burura: Diego Garzia. Ezagutu zenuten, harreman asko izan zenuten berarekin, korrikalari ospetsu izan zen, korrikan hil zen, baina hori baino gehiago zen Diego Garcia.

Neurria: Hamarreko handia
Doinua: Mutil koxkor bat itsuaurreko I

S. Lizaso:         Laguna eta adiskidea,
                      bazuen bere dizdira.
                      Gure artetik Jaunak eraman
                      berak nahi zuen tokira,
                      eta geroztik gu hemen gaude
                      nun ote dagon begira.
                      Halabeharrez joan zitzaigula
                      zortzi egun pasa dira,
                      eta geroztik zerua ere
                      negar malkotan ari da. (bis)

Egaña:             Baina den-dena ez da malkoa
                      goiko lainoen ertzian,
                      sarri izarrei jarduten gendun
                      tabernan ateratzian.
                      Gerora ere segi nahi degu
                      orain arteko antzian:
                      sagardotegi batetik irten
                      ta kantuan arratsian...
                      Orain Diegori jardungo gera
                      izarrei begiratzian. (bis)

Gorrotxategi:    Nagon lekutik begira nago
                      han goiko hodeietara,
                      Diego Garcia joan berri dan
                      eremu horietara.
                      Hemen nahi gendun ta behar gendun,
                      zergatik joan zaigu hara?
                      Bere lagunak ginan guztiok
                      saminez gelditu gara;
                      lurrak emana lurrak eraman,
                      bizitzako legea da.

S. Lizaso:         Hain zen umila dohaiak zitun
                      harek ugari beregain!
                      Bizitzan ere jokatzen zuen
                      gizonik finenaren lain.
                      Bera joan da ta agur orain
                      hainbat lagunarte bikain.
                      Hainbat sufritu ta azkenean
                      kolpez heriotza ordain.
                      Lehen heriotzai beldurra nion,
                      gorrotoa diot orain. (bis)

Egaña:             Ez dakit ziur Diego Garziak
                      parekorikan nun duan,
                      denok dakigu izarra zela
                      atletismoan munduan,
                      baina askoz'e izarrago zen
                      harremanaren orduan.
                      Konsuelotxo bat behinepehin denok
                      degu barrunpe minduan:
                      bere jirako lagun guztiak
                      hobeak egin ginduan. (bis)

Gorrotxategi:    Bizi guzian beti presaka,
                      bizi guzian korrika,
                      urteetan gora joanagatik
                      ez zan erori amilka,
                      bere atzetik gelditzen ziran
                      hamabitikan hamaika.
                      Agur ein gabe joan da betiko,
                      hori degu gero marka!
                      Eulia aina ere ez gera
                      ondo pensatzen jarrita. (bis)