Bapatean 2001

Bergara (2001-04-07)

Bertsolariak: Sorozabal, I. Elortza, Irazu, Mañukorta eta X. Zeberio.

Gai-emailea: Unai Hormaetxea.

Matienako jaietan urtero egiten den jaialdia. Ikastetxean izan zen, gaueko hamar eta erdietan. Saio polita entzun zuten bertaratu ziren entzuleek.

I. Elortza-Sorozabal-Mañukorta

Gaia: Zuek, bakoitza bere garaian, neska berberaren mutil-lagunak izan zarete. Orain, hirurotatik inor ez dabil neska horrekin, baina garai haretako txutxumutxuetaz gogoratzen zarete.

Neurria: Seiko txikia
Doinua: Bertsuak jarri dizkat

Mañukorta:       Egi galanta da-ta
                      arren ez gorritu,
                      Mañukorta zahar honek
                      komeriak ditu,
                      nerekin gozatzen zan
                      bihotzeko Maritxu. (bis)

Sorozabal:        Maritxuk Mañurekin
                      egin zuen plana,
                      gero hau utzi zuen
                      eta neregana.
                      Gaixua bildurtuta
                      etorri zen dana! (bis)

I. Elortza:        Hemen igurtzi egin
                      eta han ikutu...
                      hauxe esaten eustan
                      ta ni itxi mutu:
                      " Mañukorta lakorik
                      ez dot ezagutu". (bis)

Mañukorta:       Gaztetan geinea(10)ginan
                      hain ikusgarriak!
                      Gaur ere jasotze'itut
                      nik bere berriak.
                      Oindik oroitzen zaizko
                      Mañuren zirriak. (bis)

Sorozabal:        Muxuak ta zirriak...
                      dioen bezala,
                      baina izutu egin zan
                      neskatxa apala,
                      esaten zun honena
                      gehiegia zala. (bis)

I. Elortza:        Sei urte Maritxugaz
                      ein nebazan teman,
                      Mañu aipatzen eustan
                      gabero ogean.
                      Azkenean frustratu
                      ta itxi ein neban. (bis)

Mañukorta:       Biok ibiltzen ginan
                      gozo herriz herriz,
                      gabian bai berotu
                      laztan eta zirriz.
                      Zigur nago, nigana
                      helduko da berriz. (bis)

Sorozabal:        Gurekin ibili ta
                      ospa berehala,
                      berriz Mañurengana
                      itzuliko dala...
                      Harek badaki honek
                      dirua daukala. (bis)

I. Elortza:         Mañuk zeozer badauka
                      bat edo besteko,
                      gaur be hiru-lau dagoz
                      ijika hasteko...
                      Zer emoten dautsezu
                      holan ipinteko? (bis)

Mañukorta:       Neskak ongi berotzen
                      beti naiz abila.
                      Lehenguan deitu zidan,
                      kontu bat isila...
                      ta hark esaten zidan
                      "hi haiz hi mutila!" (bis)

Sorozabal:        Erromerira joanda
                      bertsotan ta dantzan,
                      gero etxe ondora
                      zeozen esperantzan;
                      belar askoik ez dago
                      Mañuren baratzan. (bis)

I. Elortza:         Jubilatu zan eta
                      sendo gorputzetik,
                      bardin goitik, azpitik,
                      aurre zein atzetik,
                      hiru orduko siesta
                      eiten dabenetik. (bis)

Mañukorta:       Hoiek utzita gero
                      heldu da nigana.
                      "Te quiero" esan ta eman
                      behar zuen dana.
                      Lehengo Juanita hori
                      laister degu Juana. (bis)

Sorozabal:        Lehenago Maritxu zen
                      honen amodio
                      eta orain Juanita,
                      hala esan dio.
                      Zuk maitasuna ez duzu
                      hartu oso serio. (bis)

I. Elortza:         Listo garelakoan
                      barrez hasi gara,
                      baina Mañun kontua
                      zein daukagun, hara:
                      Maritxu zein Juana,
                      poligamoa da. (bis)