|
I. BERTSOLARITZAREN IZAERA GAUR 1. Bertsolaritzaren kokapena: euskararen komunitatea 2. Bertsolaritzaren tokia euskararen komunitatean 3. Egungo bertsolaritzaren adierazmailak
II. BERTSOLARITZAREN OREKA ETA DESAFIOAK. TRADIZIOA IKUSPEGI SORTZAILETIK BIZI NAHIAN
III. BAT-BATEKO BERTSOAREN SORKUNTZA PROZESUA
|
1 Bertsolaritzaren kokapena: euskararen komunitatea
Euskararen
komunitatea 600.000 hiztun inguruko(14)
hizkuntza komunitatea dugu, estatu espainiarreko lau lurralde eta estatu
frantziarreko hiru lurraldetan banatua. Guztira lurraldeotako biztanleria
hiru milioitik hurbil dabil. Hizkuntza komunitate txikia dugu, beraz,
euskararena, eta bere jatorrizko lurraldean minoritarioa. Bestetik,
sakonera historiko handiko komunitatea dugu. Hainbat jakintzatako azken
datuek bere jatorri aurreindoeuroparra baieztatzen dutela dirudi, euskara
Europako hizkuntza komunitate zaharrenetakotzat joz. Badu bere garrantzia
gure hizkuntza komunitatearen ibilbideko gakoetan erreparatzeak: sustraiei
eusteko erresistentzia, hainbat garai eta testuingurutara etengabe moldatzeko
gaitasuna, oreka zailetan izaerari eutsiz. Gako eta jokamodu hauek badute
nolabaiteko lotura bertsolaritzaren oraina eta etorkizuna ulertzeko moduarekin
eta, oro har, euskararen garabideak bizitzeko moduarekin. Halakoxea da, beraz, bertsolaritza aterbetzen duen komunitatea, euskararen komunitatea: komunitate koxkorra, biziraupen eta moldaketan esperientzia deigarri bat duena, garaiotan etorkizunera begira bizi-kinka berezia duena, dagoeneko zenbait lurraldetan hizkuntzaren biziberritzea galtze-zorian daukana eta hizkuntza uniformizaziorako indar berrien desafio zailen aurrean dagoena. Desafio honek, nolanahi ere, bertsolaritzaren mugimenduarentzat zentzu dramatiko eta etsigarria baino gehiago izaera pizgarri eta ludikoa du. |