Atal honen hasieran argi utzi nahi dugu honako ideia hau: gaiak sortzeko hainbat bide dira hemen proposatzera goazena. Baina hori bakarrik; ez gehiago, ez gutxiago. Beste era batera esanda, gai-jartzearen eginkizunean urte batzuk darabilzkien jendeak erabili ohi dituen iturrien bilduma da hemen eskaintzera goazena. Eta jakina, aholkuren bat ematekotan, hauxe bururatzen zaigu: egokiena iturri desberdinetatik sortutako gaiak jartzen ahalegindu behar da. Bestela, jaialdian desorekak gertatzeko arriskua egon daiteke. Esate baterako, ezin dugu saio osoa taxutu inguruko erreferentziekin bakarrik. Eta, halaber, ezin da jaialdi osoa eguneroko albisteen inguruan prestatu. Egokiena, sukaldarien antzera, osagai desberdinekin saltsa txukuna sortzea da.

Nola sortu, beraz, bertsotarako gaiak?. Sormen hutsari aterik itxi gabe, ondorengo orrietan dituzue erabiltzen ditugun zenbait bide edo iturri. Iturriak zerrendatu ondoren adibide praktiko bat duzu eta jarraian ariketa bat zeuk, irakurle, burutu dezazun.