A. Goikoetxea

Kartzelako lana

Gaia: Zientziak aurkikuntza garrantzitsuak egin ditu azkenaldian. Hemendik aurrera posible izango omen da bizitzaren iraupena luzatzea. Hiru bertso, nahi duzun neurri eta doinuan.

Neurria: Zortzi puntukoa
Doinua: Itsaso hori dago zatarra

Alai ote da, ote da hitsa,
bizi izatea gure ekintza?
Zenbait lekutan egoera da
tristea eta murritza. (bis)
Dirua dugu baldintza,
horixe omen da giltza,
eta halaxe gabiltza.
Nahiago nuke horren partetik
beste berri bat balitza,
inoiz bukatzen ez dena ere
ezin da izan bizitza! (bis)

Berrikuntzetan hainbeste mota
begien bistan hortxe dago-ta,
ikusi berriz zientzilariek
aurkeztu diguten sorta! (bis)
Hori zen beren borroka,
hori zen beren erronka,
garaipen edo porrota.
Ez dut esaten bizitza dela
erabili eta bota,
baina zergatik joan behar dugu
beti naturaren kontra? (bis)

Garaipen bat da sarri akatsa
berri on bat da maiz berri latza;
ibilbideak izan behar du
nunbaitetikan mudantza. (bis)
Mundu zahar honen balantza
etorri da guganantza,
ta egiten dut zalantza:
ikerketetan ez al da behar
noizbaite aldatu martxa?
Luza dezagun goseak hiltzen
dauden hoien esperantza. (bis)

I. Elortza

Kartzelako lana

Gaia: Zientziak aurkikuntza garrantzitsuak egin ditu azkenaldian. Hemendik aurrera posible izango omen da bizitzaren iraupena luzatzea. Hiru bertso, nahi duzun neurri eta doinuan.

Neurria: Zazpi puntukoa
Doinua: Munduan libre bizi izatea

Alde batetik begiratuta
ez da notizi zatarra,
baina zientziak ere behar du
bere atzetik oharra.
Ba ote dugu guk betirako
bizi izateko beharra?
Notiziak barra-barra,
bada nahiko zarraparra,
baina betiko bizitza ere
izan ahal da bizi txarra,
ta bizi ona eukitzea da
nik gura nukeen bakarra. (bis)

Kontaezina, sinestezina
aurrerapenen ilada,
berri bitxi ta sinesgaitzekin
betea azken bolada.
Gizakia ustez gaur egun dugu
guztiaren ugazaba;
zientziaren abiada,
noraino heldu den, hara!
Baina niri hori ez zait inporta,
esana baitaukat jada:
zertan luzatu bizimodua
sufritzeko baldin bada? (bis)

Baina hara zer lor dezaketen
buru batek ta esku bik,
"bizimodua luza liteke"
hor lagunak ohartu dit.
Nire ustetan horrek ez dauka
ez hankarik, ez bururik;
nire ahalmenak bildurik,
nik egina dut konturik
ta nahiago dut lehen bezelaxe,
halaxe uste baitut nik:
heriotzarik ez badaukagu
bizitzak ez du zentzurik. (bis)