Irazu

Hasierako agurra

Neurria: Berezia
Doinua: Iparragirre abila dela

Saioa umorez hasi nahi nuke,
lagunei adarra juaz:
Egaña igual etorriko zan
txapelerako asmuaz;
Lizaso eta biak,
bertso torre bikiak,
beren ke ta beren suaz...
bat bere kaxa erori da-ta
bestearen bila guaz. (bis)

Egaña

Hasierako agurra

Neurria: Bederatzi puntukoa
Doinua: Banator bagatozela

Banator bagatozela
neroni eta txapela,
alperrik nator bestela.
Ia egoki betetzen dudan
tokatzen zaidan papela,
baina zer naiz ni tipo txikia,
zer naiz ni tipo txepela?
Nere burua ikus dezaket
birus bat banitz bezela,
ta susmoa dut beste zazpiak
gripearekin daudela;
ni behin betiko gainditzekotan
izerditu dezatela,
bila datozen piloto hoiek
preparatu ditezela.